رباعيات صلاح جاهين

"خرج ابن أدم من العدم وقلت ياه....
رجع ابن أدممن العدم وقلت ياه.....
تراب بيحيا وحي بيصير تراب
الأصل هو الموت ولا الحياة؟
عجبي"

"مع إن كل الخلق من أصل طين
وكلهم بينزلوا مغمضين
بعد الدقايق والشهور والسنين
تلاقى ناس أشرار وناس طيبين
عجبي"

"ودخل الربيع يضحك لقاني حزين
نده الربيع على اسمى لم قلت مين
حط الربيع ازهاره جنبي وراح
وايش تعمل الازهار للميتين
عجبي...."

"الدنيا أوده كبيرة للانتظار
فيها ابن أدم زيه زى الحمار
الهمواحد...والملل مشترك
ومفيش حمار بيحاول الانتحلر
عجبى...."

"اعرف عيون هى الجمال والحسن
واعرف عيون تاخد القلوب بالحضن
وعيون مخيفه وقاسية,وعيون كتير..
وبنحس فيهم كلهم بالحزن
عجبى...."

"قالو الشقيق بيمص دم الشقيق
والناس ماهياش ناس بحق وحقيق
قلبى رميته وجبت غيره حجر
داب الحجر..ورجعت قلب رقيق
عجبى...."

"ليه يا حبيبتى ما بينا دايما سفر
ده البعد ذنب كبير لا يغتفر
ليه يا حبيبتى ما بينا دايما بحور
أعد بحر الاقى غيره انحفر
عجبي..."

"نسمة ربيع لكن بتكوى الوشوش
طيور جميله بس من غير عشوش
قلوب بتخفق ... انما وحدها
هى الحياة كده؟كلها فى الفشوش
عجبى..."